TALOFA!

Talofa Lava!
O lenei poloka (blog) ua foaina ma fauina mo ni faamoemoega taua. E ui ina ua leva ona fuafuaina lenei "upega tafa’ilagi" ae o lona faatinoina i le taimi nei ua faamautuina ona o nisi o tusitusiga taufa’asese ma taufaaleaga na tusia i le nusipepa o le Samoa Observer, e faasaga i mata’upu faavae, talitonuga ma a’oa’oga ‘autu a le Ekalesia a Iesu Keriso o le Au Pa’ia o Aso e Gata Ai.

O nei tusitusiga ma faiga faasagatau i le Ekalesia Mamona, e le o ni faiga fou i luga o le Initaneti ma isi nofoaga, ae talu ai ona o le televave o faiga faatekonolosi o fesoota’iga i nei ona aso, ua mafai nei ona o’o atu ‘ave ma aafiaga o nei tusitusiga i Samoa. Ma e ui fo’i ina o loo matele pea ina faaaogaina le Gagana Peretania i nei tusitusiga, ae ua mafai lava ona malamalama iai tagata Samoa. E iai le taofi e mafai e nei tusitusiga taufa’asese ona fulisia, faasese ma ‘olegia nisi o tagata, ae maise i latou e avaga gofie, ma le le fetalaa’i, o o latou manatu ae maise i tulaga tau i lotu ma tapua'iga. O nisi fo’i e le o matua mamau a’a o a latou molimau o le Tala Lelei a Iesu Keriso, e lia’iina gofie e nei ituaiga tusitusiga taufaaleaga.

I lenei la poloka, o le a taumafai e tusia ai ni faamatalaga ma tusitusiga mo faamoemoega nei:

1. In ia faamalamalama ai nisi o tusitusiga taufa’asese e uiga i le Ekalesia Mamona ma ona talitonuga,

2. E tuuina atu ai nisi o mataupu ma a’oa’oga faavae a le Ekalesia mo le silafia lautele, ae maise mo i latou o loo iai ni faanaunauga faamaoni e sa’ili ma mafaufau loloto i a’oa’oga faale-agaga ma mataupu moni e uiga i le Tama i le Lagi ma Iesu Keriso.

3. Ina ia fesoasoani i le tapu’eina o le malamalama ma molimau a tagata o le Ekalesia a Iesu Keriso, ae maise i latou e le lava le malamalama i le Gagana Peretania.

4.  E tuuina atu ai fo'i ni tala fou (news) ma nisi tala aoga e uiga i le Ekalesia a Iesu Keriso i le Gagana Samoa.

5. Ma nisi tala e talafeagai ma le faamoemoega autu o lenei poloka.

O le fausaga, anofalega ma faagasologa o tusitusiga i lenei poloka, o le a taumafai e tuuina atu i ni faiga e faigofie ona malamalama ai tagata lautele. Ma talu ai ona o le faamoemoega ma tulimata’iga autu, o tagata Samoa lava ia, o le a matele ai ina faaaogaina le Gagana Samoa, ae o le a iai foi nisi o vaega e faaaogaina ai le Gagana Peretania. O nisi fo’i tusitusiga o le a fefiloi ai gagana e lua.

Faamaninoga:
O le igoa Ekalesia a Iesu Keriso o le Au Pa’ia o Aso e Gata Ai, o le igoa aloa’ia lea mo lenei poloka, ae o le a faaaogaina fo'i nisi igoa e suitulaga ai e pei o nei: Ekalesia a Iesu Keriso (Church of Jesus Christ) Ekalesia Mamona (Mormon Church).  I le faa-Peretania, o le a faaaogaina fo'i le LDS Church.