O le Aiga Atua

O le Aiga Atua (Godhead): E Mavaevae pe Tolu-ae-Tasi?
E masani ona tu’ua’iina tagata o le Ekalesia a Iesu Keriso e faapea latou te le faaaogaina, talitonu pe malamalama fo’i i le Tusi Pa’ia. O nei taofi ua matua sese lava. O le tele o mata’upu faavae o le Ekalesia Mamona, e aumai ma faavaeina lava i le Tusi Pa’ia.  O le tusi a Iakopo (Iakopo 1:5) na musuia ai Iosefa Samita e tatalo, na mafua ai ona maua le Ulua’i Faaaliga (First Vision).

O le faatulagaga faavae o le Ekalesia i ona tofiga e iai perofeta, aposetolo, fitugafulu, peteriaka, ma isi o loo maua lea i le Efeso (Taga'i i le Efeso 2:19-22; 4;11-16) .  Ma ua leai se isi ekalesia ua atoa iai nei tofiga (perofeta, aposetolo, a’oa’o, evagelia, ma isi) e pei ona faavaeina ai e le Faaola lana Ekalesia anamua, tau lava o le Ekalesia a Iesu Keriso o le Au Pa’ia o Aso e Gata Ai.

'Oto’otoga o le Tala Faasolopito o Talitonuga Kerisiano e pei ona ia i ona po nei.
O le tele o talitonuga o loo iai i le taimi nei i ekalesia Kerisiano (Christianity), e aofia ai le talitonuga i le Tolutasi Paia, sa faia i ni maliega ma i’ugafono a Konasitanetine (Constantine) ma nisi o le ‘au failotu i ni fonotaga sa faia i Naisia (Nicaea, Turkey). Faitau ma su’esu’e atili i le Nicene Creed mo se malamalamaga atili.
I le tau amataga o le talafaasolopito o mataupu tau Kerisiano, ae maise i totonu o seneturi e tolu muamua (third century), na tuufaasolo ane ai ni talitonuga faavae e uiga i le Atua. O nei talitonuga eseese na lalamua ai le talitonuga e ta’ua o le Arienisi (Arianism). O se tasi o vaega o talitonuga faa-Arienisi e uiga i le Aiga Atua (Godhead) - Atua le Tama, Atua le Alo, Atua le Agaga Pa’ia - e mavaevae i latou, ma e ese’ese fo’i o latou uiga ma natura. Ona sa faasolo lava ina talia e le lautele lenei talitonuga, ma faatupuina fete’ena’iga ma nisi o talitonuga taatele o mataupu tau lotu o lea vaitaimi, sa talo loa e Konasitanetine (Constantine) o le Emeperoa o Roma (Roman Emperor) se fono tele a epikopo ma nisi ta’ita’i o le Ekalesia i na ona po. O lenei fonotaga sa faia i le tausaga e 325 T.A. (325 AD) i le nu’u/a'ai o Naisia. O le faamoemoega o lenei fonotaga ina ia faamautuina ai nisi o talitonuga faavae o le Ekalesia Kerisiano (Katoliko), ma ina ia tasi se faaupuga o talitonuga, ae maise lava le faamatalaina o uiga ma le natura o le Atua ma le Aiga Atua. Sa tolu ni itu o felafolafoa’iga ma finauga i lenei fonotaga - Sagato Alesana (St. Alexander), Ariusi (Arius), ma Homoiusia (Homooiusian) ma na i’u nei finauga ma soalaupulega ma fulisia ia faaaogaina le manatu o le vaega a Sagato Alesana, e faapea: E tolu vaega ae tasi lava le Atua (Tolu ae Tasi). Sa faaali fo’i e faapea o se talitonuga lenei na tuufaasolo mai i le ‘au Aposetolo.
O i’ugafono ma faai’uga o lenei fonotaga ua ta’ua o le Ta’utinoga a Naisia (Nicene Creed). O lo’o aofia ai i totonu o lenei Ta’utinoga le tele o mata’upu faavae o loo tau’aveina ma talitonuina pea e le tele o lotu ma tapua’iga o loo iai i le li’o ua ta’ua o le "Talitonuga Kerisiano". O se tasi o vaega ‘autu o lenei maliega fai faatasi, o le foaina lea o se talitonuga tutusa e uiga i le natura o le Atua e leai sona tino o a’ano ma ivi ae ua na o se Agaga. O iinei fo’i na amata ai ona foaina ma avea le Tolutasi (Trinity) ma talitonuga faavae, e pei ona talitonuina e le Au Kerisiano i ona po nei, se’i vagana ai le Ekalesia a Iesu Keriso e talitonu i se Aiga Atua e mavaevae, ae tasi pe tutusa i o latou faamoemoega, manatu ma finagalo.